Өзін –өзін тану сабағының құрылымы.
Мектеп 4 ОМ. Мерзімі: 18.04.16 ж. №29 Тақырып: Табиғат –денсаулық мекені.
Құндылық: дұрыс әрекет.
Қасиеттер: денсаулық пен тазалық, жанашырлық, бәрін жақсы көру.
Мұғалім: Жакибаева А.З. Сынып: 2 «б» Оқушылар саны: 16
Мақсаты: Табиғаттың денсаулық мекені болатыны адам өмірінде дұрыс әрекет құндылығынан туындайтыны туралы түсінік беру. Міндеттері: - оқушыларға денсаулық пен тазалық туралы түсінік беру; - оқушыларда жанашырлық қасиеттерін дамыту; - оқушыларды бәрін жақсы көруге тәрбиелеу.
Ресурстар:
оқулық, дәптер
(сюжетті
суреттер)
Сабақ барысы
Ұйымдастыру кезеңi: Сәлемдесу. Оқу құралдарына назар аудару.
5Т (Тәртіп, Талап, Тазалық, Тыныштық, Татулық)
Тыныштық сәтi. ОРМАНҒА ОЙША СЕРУЕН.
Мұғалім: Арқаңызды тік ұстап отырыңыз. Көзіңізді жұмып, терең тыныс алыңыз. Әрбір тыныс алған сайын неғұрлым көбірек босаңсып, сабырлы болуға тырысыңыз. Қазір біз орманға серуенге шығамыз. Өзіңіздің сынып есігіне қарай беттеп, есікті ашқаныңызды, дәлізбен өтіп, далаға шыққаныңызды елестетіңіз. Таза ауаны жұтып, шашыңызды желбіреткен желдің лебін және бетіңізді сәл-пәл қыздырған күн сәулесін сезініңіз. Орманға қарай жүре бастаңыз. Келе жатқанда абай болыңыз, жәндіктерді басып кетпеңіз. Бір минут тоқтап айналаға көз салыңыз. Табиғаттың әсемдігі мен балғындығын сезініңіз. Гүлдердің біріне жақындап, еңкейіп, оның нәзіктігі мен жұқалығына зейін салыңыз. Оны иіскеңіз және хош иісін жұтыңыз. Айналадағы бар нәрсені бақылап, ары қарай жүре беріңіз. Гүлдер, гүлдер мен ағаштардың иісі, құстардың дауысы және жәндіктердің ызыңы. Орманға ендей түсіңіз, қараңызшы, ағаштар биіктей әрі қалыңдай түсті. Жарық пен көлеңкенің ойынын қызықтаңыз, жапырақтардың сыбдырын тыңдаңыз. Біз өзімізді орманда бақытты әрі қауіпсіз сезінеміз. Алаңқайға шығып, осында бірнеше минут демалыңыз. Түбіне барып отырғыңыз келетін ағашты таңдаңыз. Ағашқа жақындаңыз да оны діңінен құшақтаңыз. Оның қуаттылығын сезініңіз, ондағы өмір қуатын сезінуге және ұғынуға тырысыңыз. Енді оның діңіне арқаңызды сүйеп отырыңыз. Көзіңізді жұмыңыз, терең тыныс алыңыз және қоршаған айналаның жым-жырт тыныштығына көңіл бөліңіз. (Осы жерде мұғалім 1-2 минут үзіліс жасауына болады).
Бізге қалайша жеңіл әрі тыныш және бақытты сезіну қандай. Табиғат неткен ғажап, оны қалайша сүйетінімізді бен қадірлейтінімізді, бірде бір тірі жәндікке зиян тигізбес үшін қамқорлық жасауды түсінеміз. Сіздің өз ағашыңыз бар екенін және кез келген уақытта оған келе алатыныңызды есте ұстаңыз. Ал қазір мектепке қайтуға дайындалыңыз. Орныңыздан тұрып, айналаға тағы бір көз қырын салыңыз. Келген жолыңызбен кері қайтыңыз, жолыңыздағы жәндіктерді басып кетпеңіз. Міне, мектептің алдына да келдік. Айналаңызға тағы бір қараңыз, таза ауаны терең жұтыңыз, есікті ашып, өз орныңызға қайтып келіңіз. Осы жым-жырттық, тыныштық, қанағат сезімін өзіңізде сақтаңыз. Көзіңізді ашып, күлімсіреңіз!
Үй тапсырмасын тексеру: Дәптерде 39 б. 2- тапсырманы орындау.
-Табиғат үшін қандай тағамдар пайдалы?
-Денсаулығы жақсы болу үшін адам тағы немен айналысу керек?
Дәйексөз:
«Табиғат тынысы – жан ырысы»
Халық даналығы.
2-рет ұлдарға, 2- рет қыздарға айтқызу. Бәріміз қосылып айту.
-Жан ырысы неде?
Әңгiмелеу: «Өсиет әңгіме»
Ертеде бір қарияның үш ұлы болыпты. Өздерінің әкесін қатты жақсы көретіні соншалық, қарттың ұзақ та сау өмір сүруін армандап, оның жолын қайдан табамыз деп, ұзақ кеңесіпті.
Әрі ойланып, бері ойланып, ақырында ел арасынан денсаулықтың мекенін іздемекші болыпты.
Үлкен ұлы денсаулықтың мекенін табиғаттың «Саялы орманынан», ортаншы ұлы денсаулықтың мекенін табиғаттың «Таза көлді» елінен, ал кіші ұлы «Көрікті жер» елінен кездестіріпті.
Ұлдарына дән риза болған қария, үш ұлының да еліне кезек-кезек барып тұрыпты.
Қария бақытты да баянды, ұзақ ғұмыр кешіпті.
-Қарияның ұлдары денсаулықтың мекенін қайдан тауыпты?
-«Саялы орман», «Таза көл», «Көрікті жер» неліктен денсаулық мекені бола алады?
Шығармашылық жұмыс: жеке жұмыс.
«Табиғатпен біргеміз» тақырыбына сурет салу.
Топпен ән айту: «Жас дәуірдің түлегіміз» Сөзі Е.Өтетілеуов. Әні И.Нүсіпбаев
Бау-бақша, белдер, Орман, тау, көлдер- Көрікті шексіз даламыз. Дәулеті тасқан, Сәулеті асқан, Көңілді ауыл, қаламыз.
Қайырмасы: Жадырап күндей, Жайнаған гүлдей, Бақытты біздер баламыз! (2 рет)
Өзіміз туған, Көбелек қуған, Өлкеде өсіп, толамыз. Жалықпай оқып, Көңілге тоқып, Білімді адам боламыз.
Қайырмасы.
Үй тапсырмасы:
30-сабақ. Дәптерде 42 б. тапсырманы орындау.
Соңғы тыныштық сәтi:
(Тыныштық... бар жерде, тыныштық... бүкiл әлемде)
- Енді көзімізді жұмып осы сабақта айтылған ойлар мен істерді ой елегінен өткізіп көрейікші.
- Барлық айтылған жақсы ойларды жүрегіміздің түкпіріне апарып орналастырайық.
- Енді көздеріңді аша ғойыңдар. Сабақ аяқталды. Бүгінгі күндерің қуаныш әкелсін!
