Башҡортостан - ғәзиз еребеҙ,
мең йылдарға торор илебеҙ!
(Башҡортостан республикаһы көнөнә арналған тантана сценарийы )
Башҡортостан гимны яңғырай.
Ҡурай моңо аҫтында алып барыусылар сәхнәгә сыға.
се алып барыусы. Хәйерле көн хөрмәтле уҡытыусылар, тәрбиәселәр!
се алып барыусы. Хәйерле көн, дуҫтар!
1-се алып барыусы. Һеҙҙе ҙур байрам – Республика көнө менән ҡайнар ҡотлайбыҙ. Был ябай көн түгел.
2-се алып барыусы. Алтын көҙҙөң йәмле мәлендә, 1990 йылдың 11октябрендә, беҙ йәшәгән ил азат дәүләт тип иғлан ителде.
1-се алып барыусы. Халҡыбыҙ тәүге тапҡыр үҙенең президентын һайланы. Һәм тарихыбыҙҙа яңы дәүер башланды.( Проекторҙан Башҡортостан символдары күрһәтелә.)
2-се алып барыусы. 1993йылдың 12 октябрендә Башҡортостан Республикаһының Гимны һәм Гербы ҡабул ителде.
1-се алып барыусы.Гимдың авторы- Фәрит Фәтих улы Иҙрисов.
2-се алып барыусы. Гербтың авторы – Фазлетдин Фәррәх улы Ислахов- беҙҙең яҡташыбыҙ. Балаҡатай районынан сыҡҡан күренекле рәссам.
1-се алып барыусы. 1992йылдың 25 февралендә флагыбыҙ ҡабул ителә. Авторҙары- Урал Тимербулат улы Мәсәлимов һәм Ольга Евгеньевна Асабина.
(Ҡурай моңо. 5-6 кластар егеттәре. Проекторҙан Башҡортостан символдары күрһәтелә.)
Башҡортостан гербы бөгөн
Яҡты залдарҙы биҙәй.
Ул ил өсөн, халыҡ өсөн
Батырлыҡтарға әйҙәй.
Башҡортостаным Флагы
Тора өс төрлө төҫтән:
Күк, аҡ, йәшел,ә уртаға
Ҡурай сәскәһе төшкән.
Зәңгәр төҫө- ул халҡымдың
Уй- ниәте, сафлығы,
Аҡ төҫ – ул именлек төҫө,
Хеҙмәттәшлек, паклығы.
Ә йәшеле - ул азатлыҡ,
Мәңгелек йәшәү төҫө.
Дуҫ, берҙәм илдә генә
Халҡым булмышы, көсө.
Ҡурай сәскәһе ете таж,
Нигеҙе- ете ырыу.
Бар милләттәр менән бергә
Бәхетле тормош ҡороу.
Республикамдың флагы
Зәңгәр күккә талпына,
Бәхет юрай, шатлыҡ теләй
Бай тарихлы халҡыма.
Концерт номеры. Ҡурайсылар ансамбле.
1-се алып барыусы. Һәр халыҡтың мәҙәниәтендә, рухи донъяһында һүҙ, тел илаһи урында тора. Халыҡтың теле лә, рухы ла изге, уға тел тейҙерергә ярамай. Шуға күрә хатта яңылыш ҡына ла телебеҙҙе һанға һуҡмауға юл ҡуймайыҡ.
2-се алып барыусы. Туған тел яҙмышы- халыҡ яҙмышы ул. Теле бөткән, телен алмаштырған халыҡ милләт булараҡ та ер йөҙөнән юйыла. Шуға күрә-
1-се алып барыусы. Күҙегеҙҙе һаҡлаған кеүек
Телегеҙҙе һаҡлағыҙ.
2-се алып барыусы. Үҙегеҙҙе яҡлаған кеүек
Бергә Телегеҙҙе яҡлағыҙ.
( Ҡурай моңо.7-8-се класс егеттәре сәхнәгә сыға. Проекторҙан милли байрамдарҙан күренештәр күрһәтелә. )
Үҙ телемдә һөйләшем,
Миңә ҡоштар көнләшә.
Үҙ телемдә һөйләшәм-
Мин ҡояшҡа тиңләшәм.
Минең телем-әсәм һүҙе,
Камиллыҡтың үҙелер,
Рухыбыҙҙың таянысы,
Милләтебеҙ йөҙөлөр.
Һәр һүҙ миңә сәскә төҫлө,
Һәр һүҙ – йәйғор киҫәге.
Шатлығымдың юҡ сиге,
Юҡ шатлығым иҫәбе.
Минең телем- ҡот-бәрәкәт,
Хоҙайҙан насип ырыҫ.
Уны балама тапшырыу-
Минең беренсе бурыс.
Башҡорт балаһы мин,
Ер хәтерендә
Мең йыл уйылып барған эҙем бар.
Быуындарға ялғап быуындарҙы
Илде тотҡан телем, һүҙем бар.
Шул тел менән халҡым хаҡ яҙмышын
Ҡайһы быуаттарға яҙмаған.
Күпме аҫыл ерҙәренән яҙған,
Күпме аҫыл ирҙәренән яҙған,
Күпме аҫыл йырҙарынан яҙған,
Тик моңонан, теленән яҙмаған.
( Концерт номеры. Йыр «Туған телем»)
1-се алып барыусы. Башҡортостан – башҡорт иле тигән һүҙ. Халҡыбыҙ борон-борондан Урал тауҙары, йылғалары буйында йәшәгән.
2-се алып барыусы. Ошондағы матур тәбиғәткә һоҡланып, Урал батыр, Аҡбуҙат эпостарын, бик күп йырҙар ижад иткән.
1-се алып барыусы. Урал тигән һүҙ ҙә башҡорт теленән алынған. Ул боролоп-боролоп, уралып ятҡан тауҙар тигәнде аңлата.
( Ҡурай моңо. Сәхнәгә 10-11 –се класс егеттәре сыға. Проекторҙан Башҡортостан тәбиғәте күрһәтелә.)
Башҡортостан- азат республикам,
Ниндәй иркен һәм бай еребеҙ!
Беҙ атларға тейеш ошо ерҙән
Хужа булып уға үҙебеҙ.
Башҡорттар өсөн ошо ил –
Тиңһеҙ бер Бәхетостан.
Башҡортомдоң баш йорто ул-
Тиңһеҙ был Башҡортостан.
Башҡортостан! Һинең гүзәллеккә
Тиң булырлыҡ ерҙәр бармы икән?
Аҡҡош кеүек ап-аҡ Ағиҙелкәй
Ҡайһы илдә генә бар икән?
Башҡортостан- алһыу таң иле,
Гөлбаҡсалар иле, дан иле.
Күкрәгеңдә нефть шишмәләре,
Тупрағыңда бөтмәҫ алтының.
Киң Рәсәйҙең сикһеҙ киңлегендә
Яҡты йондоҙ булып балҡының.
Һиндә тыуа изге теләктәр,
Ярһып тибә ҡайнар йөрәктәр.
Данлы илем, гүзәл республикам,
Бүләк булһын һиңә йырҙарым.
Һандуғастар тымып тыңлаһын,
Киң ҡырҙарың ҡушылып йырлаһын...
(Концерт номеры. «Башҡортостан» йыры. Шарҙар менән барыһы ла сәхнәгә сыға.)
1-се алып барыусы. Хөрмәтле дуҫтар! Алдағы тормошоғоҙҙа ла халҡым, ерем,телем тип янып йәшәргә яҙһын беҙгә. Атаһы таңдарыбыҙ имен булып, көндәребеҙ файҙалы үтһен!
2-се алып барыусы. Барығыҙҙы ла байрам менән!
ДЫУАН РАЙОНЫ РЕСПУБЛИКА ЛИЦЕЙ-ИНТЕРНАТЫ
Башҡортостан - ғәзиз еребеҙ,
мең йылдарға торор илебеҙ!
(Башҡортостан республикаһы көнөнә арналған тантана сценарийы)
Төҙөнөләр: башҡорт теле һәм әҙәбиәте
уҡытыусылары Баева Гүзәлиә Рид ҡыҙы,
Нуриева Әлфирә Йәмил ҡыҙы
Мәсәғүт 2013
