Эрзямокшонь народонть историясь моросо
(Авольклассо ловномань коряс урок 8-це классо)
Топавтызе Калигина Т.И.
Эрзямокшонь народонть историясь моросо
Целесь: невтемс эрзямокшонь моронть мазычинзэ, тонавтомс кунсоломо ды чарькодеме народной моронть, содамс эсь народонть историянзо ды сонзэ марто сюлмазь моротнень.
Оборудованиясь: книгань нупаль, икелень оршамопельть, карта.
Эпиграфось: кода эри народось, истят сонзэ моротне.
Уроконь молемась
Тонавтыцясь: Мекс минь течи карматано кортамо эрзя-мокшонь моротнеде?
Морось – те народонть историязо. Моры народось, зярдо эрямозо паро. Моросо пингеде пингес ломантне кортасть эсест стака эрямодонтькак. Паряк, састь неть шкатне, зярдо эряви лецтямс минек историянть. А историясь эрзятнень ды мокшотнень кезэрень. Васенцеде кортави минденек «Повесть временных лет» летописенть эйсэ. Сюпав минек историясь, ламо моронок. Но ламо стувтовсь, ламодо минь а содатано.
Саранскойсэ 1990-це иестэ августонь 3-це чистэ саезь 5-це чис роботась «Масторава» обществань васенце промксось. Кие бу аволь корта, сехте сэредьксэкс тештизь тиринь келенть ёмамонзо. Минь карминек пелеме ды визьдеме эсь кельсэ кортамо. Стувтынек моронок-коенек. Емасть эрзямокшонь моданть лангсто 940 велеть. А ведь минек народось а вишкине. Фино-угорской семиясо аштетяно венгратнень ды финтнэнь мельга. Нейгак эрзятнеде ды мокшотнеде миллиондо ламо. Улить эрзянь велеть Армениясо, Пенза, Самара, Оренбург енкссо, улить Канадасояк.
Паро, што седее покш мель кармасть явомо эрзянь ды мокшонь кельтненень.
А.А.Шахматов кортась: «Эрзямокшонь моротнень содержанияст пек разнообразнойть… Эряви евтамс, што те народонть улить ламо исторической моронзо. Пурнамс неть моротнень – благородной тев…»
Тонавтницясь: Эрзямокшонь раськесь – олянь вечкиця. Исторической моротне видестэ лемдязь «Народонть поэтической историякс». Исторической моротне чачсть, зярдо кармасть кайсевеме рась кенть лангс ногайть. Сынь свал невтить виде исторической тевть.
Тонавтыцясь: Ученойтне ламо роботасть сень лангсо, штобу пурнамс моротнень ды нолдамс моронь сборникть. Евсевьевень «Эрзянь морот» васенце книгась нолдазь 1928-це иестэ, 1929-це иестэ лиссь «Мокшонь морот» сборникесь. 60-це иетнестэ лиссь сборник, козо совасть 27 морот, а 1977-це иестэ лиссь книга, козонь совасть 174 исторической морот. Эрзямокшонь исторической моротне жанрань коряс явовить зярыя группас.
Минек фольклорсо полондо моротне арыть малав васенце таркас. Неть моротнетематиканть коряс кандовить балладас: ули сюжет, кортави народонть стака эрямодо. Мик нурсема моротнесэяк те неяви. (Ловновит зярыя морот).
Тонавтницясь: Сюжетень основакс неть моротнесэ сеетьстэ эрси апак фатя зыянонь самось. Ногайтне раужо пелькс каявильть эрзянь велетнень лангс ды сайнильть полонст тейтерь-ават, од церат, эйкакшт. Ломанесь саеви полонс важодема таркасто, вирь куншкасто.
Тонавтыцясь: Ловносынек моронть «Вирь чиресэ».
Полонс саезенть кармавтылизь важодеме чинек-венек. Чить – паксясо, веть – вансь ногаень эйкакш.
Ногаень авась наказыль:
Иля евта, эрзянь цера, берянь вал,
Иля евта, туень вардо, берянь вал,
Те тякинесь, эрзянь цера, вейкине,
Те тякинесь, эрзянь аля, ськамонзо.
Но церась нурсемстэ моры:
Утю-балю, ногай левкс,
Ногай авань тяказо,
Башкир авань тяказо.
Сэрень пелев люкштядтян-
Сэрень пелев сивезэ.
Пирянь пелев люкштядтян-
Превень пелев маштозо.
Те нурсема моросонть невтеви эрзянь церанть урексчинть каршо молемась. Моронь валсо сон сюды полонс саицянзо, сюды эйденть, кона поладсы ногаенть родонть.
Лия моротнесэ кортави, когда од алясь арси оргодеме. Оргоди, но сонзэ кундасызь мекев. Улить морот, косо сазорось лезды алянтень оргодемс полонсто, или жо кавонест туить.
«Виртява» моронть эйсэ кртави, што Виртява тейтересь пек мазый, ламо якасть кудат тензэ, но тетязо миизе сонзэ сюпав киргизнэнь, кона макссь покш калым. Полондо эрзямокшонь поэзиясь седейризнэмань.
В.Радаев «Сияжар» произведениясонть невти, кода мокшэрзятне рузтнэнь марто вейсэ тюрсть татаро-монголтнэнь каршо. (Евтынк рузонь ды эрзянь богатыртнень лемест. Кить сынь?).
Тонавтницясь: Эрзямокшотне а весть кепсевсть ногайтнень каршо. 1444 иестэ тюрсть вейсэ рузтнэнь марто Мустафань каршо, кона кайсевсь Рязанской княжестванть лангс. Эрзямокшотне лездасть Иван Грознойнень, зярдо тона мольсь казанской царстванть лангс. Документтнэ невтить, што эрзятне ульнесть ветицякс Московонь инязортнень. 1552 иестэ Казань лангс молемасонть ульнесть Темниковонь мокшот. Неть исторической событиятнеде корты морось «Саманька». Саманька тейтересь смел. Сон севны рузонь инязоронть марто, мекс тона те шкас а сайсы Казань ошонть. Сон бу лездаволь тензэ. «Я бы, красная девушка, город Казань взяла. В три часа под свои руки подобрала». Маризе тень Иван Грозной. Сон кучизе тейтеренть Казань ошов. Ошось саезь. Саманька а веши тень кисэ казне.
Прошу тебя, великий государь,
Меня, пожалуй,
Ничем не жалуй.
К отцу-матери отпусти,
На родину вели меня отвезти.
Лия моросо невтеви, што Казань ошонть лездась саемс Марезь од алясь, виев ды смел.
Тонавтницясь: Эрзятнень ды мокшотнень улить морост, конат токить эрьвейкень седейс. Те мокшэрзянь аволь стака эрямодо морот. «Ташто велесэ», «Федай», «Од ава», «Маря ашти чаво банясо», «Микитань куля».
«Од ава» моронть эйсэ кортави, кодамо стака эрямозо тейтерень од ава марто. Сон ковгак а нолдтни тейтеренть. Ялгатне тердить налксеме, а од авась музгорди лангозонзо, што тейтересь нузякс, беряньстэ важоди кудосо. Муськи тейтересь ангсема лангсо, кельмесь, сельведтне певерить ведентень. Лужанясто моли те морось.
Пек паро морось «Ташто велесэ». Сонзэ эйсэ кортави бедной семиядо. Тейтеренть максызь пек одсто боярнэнь важодеме.
Тонавтницясь: Улить морот эрзямокшонь авадо-солдаткадо. Стака авань эрямось, кавксть стака, зярдо мирдесь тусь служамо. Кие лезды авантень, кинень панжсы сон седеензэ? Истямо морось «Федай» ды «Вай, иля пува».
Иля пува, варма, вирь лангов,
Иля кандо, варма, куз лангов,
Истякояк тошна пичентень касомс,
Истякояк грусна кузонтень кептемс.
Се пиченть ало Федай аварди,
Се кузонть ало Федай мелявты,
Кие неизе авардемеде,
Кие редизе мелявтомадо.
Покш уряжозо сонзэ неизе,
Покш васькамозо сонзэ редизе.
- Мекс тон авардят, Федай, парыям,
Мекс тон мелявтат, парыям-дугам?
Ванянь-Ванюшань саизь солдатокс,
Мазый Любушань примизь некрутокс,
А мон кадован солдаткакс-довакс.
Тонавтыцясь: Кода эрзянь фольклорсо, истя рузоньсэяк улить морот, конат алтазь те темантень: «Отслужил солдат службу верную», «Ехали солдаты со службы домой».
Сехте лужанят, монь койсэ, моротне уроз долядо: «Уроз Татюша», «Эрзянь цера» (ловнови морось), «Косо, косо?»
Пек стакасто эрясть сокицятне-видицятне. Валскестэ чопода чокшнес важодсть бояронь кедьсэ. Кулома вешсть. Живтнень сельмест сявадсть кулозетнень лангс.
Сон тусь васов емамо.
Сон тусь васов куломо.
Вай, ней сюпавнень а понги,
Вай, ней сюпавонь кедьстэ менсь.
Вай, кадык лучи кулозо,
Вай, кадык лучи емазо.
1762 иестэ саезь 1772 иес Россиясо ульнесть 40 покш крестьянтнэнь кепсевемат. 1773-це иестэ инязоронть каршо кепететсь покш вий. Бедной ломантнень ветясь Емельян Пугачев. Ульнесь Пугачев Саранскойсэяк. Сась сон чилисема ендою
Валске марто июлень 27-це чистэ ошонтень совасть казакт ды мерсть, штобу вастомс «Царь-батюшканть» кши-сал марто. Бути истя а теить, пултасызь ошонть. Эзь кенере валгомо Пугачев Посопонтень, кода весе церьковатнесэ гайгезевсть баягатне. Пугачевонь войскас совасть ламо эрзят, мокшот, рузт, татартю
Эрзямокшонь фольклорсо Пугачевдо морот аволь ламо. Весемезэ 35. Весемеде икеле появась морось «Ко ендо лиси уродимой Пугачев». Сехте содавикс морось «Пугачев». Те мокшонь моро, кона сермадозь 1936 иестэ.
- Вай, ванодоя,
Тынь ванодоя!
Кода вирь палы,
Кода вирь увны;
Чувтнэнь юткова
Тол а неяви,
Качамо а лиси,
Се а вирь палы,
А Мокшась чуди-
Пугачев истя
Войсканзо вети.
Улить морот, конатнесэ невтеви, кода инязоронь войскатне лепштизь Пугачевонь.
Покш тюрема
Кепедсь сестэ, вай,
Чудесь ломань верь,
Кода вишка лей.
Пугачев эрзямокшонь моросо невтеви кода инязор.
Тонавтницясь: Лемдямось эрзямокшонь моданть лангсо ушодовсь 18 пингень 40-це иетнестэ. 1742 иестэ Нижегородской губерниясо од верас совасть 50928 ломань. Но эрзятне ды мокшотне а мельсэ примасть од веранть.
Кепетсть восстания, кона ульнесь лепштязь: 74 ломанть чавозь, 130 – саезь полонс.
Ванстовтсть зярыя морот, косо кортави эрзятнень ды мокшотнень од верантень а кемемазо.
Мон пелилинь, тандадылинь
Сарлейн велень церькувадонть.
Поптнэ, дьяконтнээ – церковной дурактне
Монь покордымизь.
Лемдямо моротнесэ невтеви, што христианствась эзь чарькодеве минек народонтень. Мамилька ялганстэнь корты: «Я вчера до вечера стояла, в русском моленье толку не нашла: все липовые образа». Те смел тейтересь понгсь тюрьмас. Стака тензэ, но ялгатненень наказы: «…свою мордовскую веру не меняй, свои мордовские законы не нарушай».
Тонавтыцясь: Кодамо келесь минек моротнень? Кодамо поэтической средства вельде невтеви моронть мазычизэ?
1. Минек моротнень эйсэ аламо метафорат. Сынь эрсить ансяк кой-кона Пугачевдо моротнесэ (киска-бояр, верьгиз-бояр).
2. Седе сеедьстэ вастневить сравненият:
ашо
Тейтересь--- мазы ---килейне
виде рунго
сэрей пиче
Од алясь---
виев тумо
Лугась---парсей.
3. Сехте сеедьстэ вастневить эпитет (од цера, сыре ногай, чопода вирь, келей мастор, валдо пакся).
Эрзямокшонь морось канды эсь лангсонзо рузонь ды финно-угорской фольклортнэнь влиянияст. Кода эрзянь фольклорсо, истя и карело-финской эпоссо «Калевала» улить геройть, конат тюрить чопода вийтнень каршо. Но те а корты седее, што эрзямокшонь морось аволь самостоятельной ды самобытной.
Кудонь тевесь: А ней вансынек, кода тынь содасынк эсенк чачома таркатнень. Сермадынк латко лемтнень, лей лемтнень. Содамс, мекс истят лемть максозь тенст.
Урокось прядовсь. Уледе шумбрат.
