Өзін-өзі тану сабағының жоспары.
Мектебі : Дина Нұрпейісова атындағы жалпы орта мектебі
Мерзімі:
Тақырыбы : Жақсылықтан жақсылыққа
Құндылығы «Дұрыс әрекет»
Қасиеттері: жақсылық, достық, қайырымдылық
Мұғалім: Капуова Лида
Сыныбы: 4 сынып
Оқушы саны 16
Сабақ мақсаты : риясыз жақсылық жасауды ұғындыра, дұрыс әрекет еткендеғана ішкі тыныштық пайда болатынын оқушыларға ұғындыру. Міндеттері:
Білімділігі :жақсылық жасаудың адам өміріндегі маңыздылығын түсіндіру;
Дамытушылығы : жақсылық жасау іскерліктерін дамыту;
Тәрбиелілігі :Оқушыларды жақсылыққа, сыйластыққа, қайырылымдыққа тәрбиелеу.
Ресурстар
Ноутбук,
Музыка,
Сабақ барысы : Ұйымдастыру кезеңі. Сәлемдесу,оқушыларды түгендеу. 5Т ережесін еске түсіру
Талап
Тыныштық
Тәртіп
Тазалық
Татулық
Тыныштық сәті :(нұрға бөлену)
Ыңғайланып отырыңыздар, денелеріңізді түзу ұстаңыздар. Аяқ-қолыңызды айқастырмаңыз. Қолыңызды тізеңізге немесе үстелге қоюға болады. Көздеріңізді жұмуларыңызды өтінемін.
Елестетіп көріңіз: Күн нұры сіздің төбеңізден өтіп, кеудеңізге қарай бойлап барады. Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді. Балғын және таза әсем гүл сіздің әр ойыңызды, әр сезіміңізді, эмоцияңыз бен тілек-қалауыңызды шайып, жүрегіңіздің қауызын ашты.
Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Оймен осы нұрды қолдарыңызға түсіріңіз. Сіздің қолдарыңыз нұрға бөленіп, сәуле шашуда. Қолымыз тек жақсы, ізгі істер істейді және баршаға көмектеседі. Нұр аяқтарыңызға тарады. Аяқтарыңыз нұр сәулесін шашуда. Олар сізді тек жақсылық жасау үшін жақсы жерлерге апарады. Олар нұр мен махаббат құралына айналды.
Одан әрі нұр сіздің аузыңызға, тіліңізге тарады. Тіліңіз тек шындықты және жақсы, ізгі сөздер ғана айтады. Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді. Нұр көздерімізге де жетті, көзіміз тек жақсыға қарап, бәрінен жақсылықты ғана көреді. Сіздің басыңыз түгелдей нұрға бөленіп, басыңызға тек ізгі, сәулелі ой келеді.
Нұр бірте-бірте қарқын және шұғылана бастайды, сіздің денеңізден шығып, жан-жағыңызға сәуле шашады. Осы нұрды туысқандарыңызға, мұғалімдеріңізге, достарыңызға, таныстарыңызға бағыттаңыз. Нұрды уақытша түсініспей, ренжісіп жүрген адамдарға да бағыттаңыз, олардың да жүрегі нұрға толсын.
Осы нұр бүкіл әлемге: барлық адамдарға, жан-жануарларға, өсімдіктерге, барлық тірі жанға таралсын... Ғаламның барлық түпкір-түпкіріне нұр бағыттаңыз. Ойша айтыңыз: «Мен нұрлымын... Нұр менің ішімде... Мен Нұрмын».
Осындай Нұр, Махаббат және Тыныштық күйінде отыра тұрыңыз...
Енді осы Нұрды жүрегіңізге орналастырыңыз. Нұрға толы бүкіл әлем сіздің жүрегіңізде. Оны осындай әсем қалыпта сақтаңыз.
Жаймен көзіңізді ашуға болады.
Рахмет.
Оқушылар өз әсерлерімен бөліседі.
2. Үй тапсырмасын тексеру: 120 беттегі «бұлақ сылдыры» әңгімесі оқып келу.
Ой-қозғау:
Шалдың әрекеті жайлы не айтар едіндер?
Сендер осылай жақсылық жасай алармедіңдер?
Шалдың жасаған жақсылыққа қандай жақсылық боп оралды?
Жақсылық жасауға дайынсіздарма?
Түйін : жақсылық жасау әр адамның қолынан келеді. Жылы жүрек,адал ниет, нәзік сезім адамды жақсылыққа бастайды.
Жаңа сабақ тақырыбы: «Жақсылықтан жақсылыққа»
Дәйексөз
«Ешқандай жақсылық зая кетпейді» (оқушылар талдап болғасын 2 рет қыздарға айтқызу 2рет ұлдарға айтқызу. Барлығы бірге 4рет айтып шығады)
Дәптерге жазып аламыз.
Дәйексөздің мағынасын қалай түсінесіңдер?
Оқушылардың пікірін тыңдау,ой бөлісу
Түйін:
Әңгімелеу : (Мұғалім сыйы)
«Тату ағайындар»
Өте ертеде бір патшалықта екі ағайынды өмір сүріпті. Екеуінің үйі таудың екі жағында болса да, олар бір- біріне көмектесіп, тату-тәтті өмір сүреді.
Бір күні ағайындылар егінді жинап алып, теңдей бөліп алады. Сол күні түнде үлкен ағасы ойлайды: «Біз егінді бірдей етіп бөліп алдық, бұл дұрыс емес. Інім жаңа ғана шаруашылығын бастап жатыр. Оған маған қарағанда көбірек керек».
Ағасы тұрып, түнде інісіне бір қап бидайды апарып тастайды.
Ал бұл кезде інісі жатып, олда ойлап жатады: «Жоқ, біз егінді дұрыс бөліскен жоқпыз. Ағамның отбасы үлкен, жасы да менен үлкен. Оған маған қарағанда көбірек керек».
Таңға жақын інісі де білдіртпей бір қап бидайды ағасына апарып тастайды.
Таңертең ағайындылар өз қамбаларына қарап, таң қалады: «Бұл қалай? Кеше бір қап бидайды ағама апарып беріп едім ғой, ал бидай азаймапты». Олар қаптарды қайта-қайта санайды да, таң қалады: «Бұл не ғажайып?!»
Түн болысымен ағасы мен інісі бір бидай қапты арқалап, үйлерінен шығады.
Толық ай туады жарықтандырып тұрған. Осы жрде қарағайдың түбінде екі ағайынды кездесіп қалады. Ағасы сұрай бастайды:
- А, бұл сен бе? Кештетіп қайда бара жатырсың?
Інісі айтады:
-А, бұл сен бе едің? Ал сен қайда бара жатырсың?
Екеуі де үндемей қалды, бір-бірін түсіне қояды да, қарқылдап күліп жіберді. Осыдан кейін екеуі бір-бірін одан да қатты жақсы көріп кетеді.
Ой-талқы
1. Екі ағайындының іс-әрекеттері дұрыс па?
2. Сен болсаң не істер едің?
3. Әңгіменің соңында ағайындыларды не біріктірді?
4. Осындай дұрыс әрекет жасап отырсақ,риясыз сүйіспеншілікпен көмектесіп отырсақ ішкі тыныштығың жай табады. Мысалы өздеріңнің өмірлеріңде осындай жағдай кездесті ме?
Түйін: жақсылық жасау адамды бақытқа, игілекке жеткізеді
Шығармашылық жұмыс. (7 мин)
Топқа бөлу. (жасыл, көк, қызыл түстер бойынша)
Жасыл түс – адамгершілік тобы
Қызыл түс – мейірімділік тобы
Көк түс – қайырымдылық тобы
Топтық жұмыс (постер қорғау)
Жақсылық пен жамандықты қалай бейнелер едіңіздер
Жақсылыққа жету жолдары
«менің жақсы істерім»
Ойын: «Сыңарын тап»
Жақсы - ...,
Әлемге бірдей.
Жақсы келді дегенше,
...келді десейші.
...нышанын
Алып келді десейші.
... үлгісі
Жанып тұрған ... .
...-ортақ, ...-ортақ,...-ортақ
Керекті сөздер: жақсылардың, күн, ай, шамдай, жақсы, жарық, ай мен күндей, жақсылықтан.
Плакат,май шам
Топпен ән айту.
«Бала тілегі»
Үйге тапсырма: қарлығаш пен дәуіт ертегісін аяқтау
Соңғы тыныштық сәті.
Баяу әуен. Оқушылар денесін, басын тік ұстап, көзін жұмып отырады. Мұғалім жай дауыспен:
Әрқайсымыз оң қолымызбен жүрегімізді ұстап көрейік. Өз жүрегіміздің жылылығын сезініп, жүрек жылуымызды адамдарға, айналамызға жеткізу үшін іштей оларға жақсы тілектер тілейк. Жақсы ой ойлайық, жақсы сөз сөйлейік, жақсы іс жасайық! Бүгінгі сабақтан алған әсерлеріңізді жүректеріңізге түйіп алыңыздар. Рахмет! Көздеріңді ашуға болады.
