Мамандықтың бәрі жақсы
Әсемпаз болма әрнеге,
Өнерпаз болсаң арқалан.
Сен де – бір кірпіш, дүниеге,
Кетігін тап та, бар қалан!
Абай атамыз айтқандай, әрбір адам өмірге келген соң дүниенің бір бөлігі, яғни бір маман иесі болып осы өмірде кірпіш болып қалануы керек. Ол не деген сөз? Ол біздің жанымызға жақын маман таңдап, сол маман шебері болу деген сөз. Мамандық таңдау – әрбір мектеп бітіруші түлектің мақсаты. «Армансыз адам қанатсыз құспен тең» дейді халық. Барлық адам баласының арманы болады. Мысалы: балдырғандар балабақшада, аулада бір -бірімен ойнап жүргенде бақыласақ, олар ата-аналарының немесе қиалындағы мамандықтарды ойнап жатады. Өсе келе сол мамандыққа деген қызығушылықтары артып сол маман иесі болып жатқандарын да көреміз. Балалық шақ пен болашақ әрқашан үндесіп жатады. Болашаққа апаратын тура жол балалық шақтан басталады. Алып қарасақ мамандықтың жаманы жоқ, бірақ өкінішке орай түлектер өзінің талпынысна қарай сол мамандықты таңдай алмай жатады. Алдымен мамандық дегеніміз не - деген сұраққа жауап іздеп көрейікші? Мамандық - дегеніміз кәсіп шегіндегі нақты қызмет саласы. Мамандық лауазымдылық міндеттердің шеңберін анықтайды. Сондықтан, әр адам жақсы маман атану үшін терең де, сапалы білім алып, еңбек етіп, өзіңе іскерлік талап қоя білу қажет. Мен де бала кезімнен мұғалім болғым келіп, әпкелеріммен, қуыршақтарыммен мектеп ойнағанды ұнататынмын. Қазіргі таңда сол мамандыққа адал болып, оқуымды аяқтаған соң арманыма қол жеткізсем деймін. Сондықтан мен мамандық таңдау аяқ асты емес екеніне көз жеткіземін. Арманшыл адам болашақта дегеніне жетеді. Мамандық пен өнерді өз қабілетіне қарай таңдап алады. Осы орайда ата-аналардың баласына мамандық таңдаудағы ықпалы зор. Өмірде мамандықтың түрі өте көп, сондықтан келешекте жанылыспас үшін дұрыс бағыт - бағдар беруге тырысады. Өмірдегі барлық мамандықтардың орны қандай? Олар ескеріліп жатыр ма біздің қоғамда? Осы мәселелерді біз мектеп қабырғасында талқылаймыз. Ұстаздарымыз бізге қажет мамандықты таңдауға байланысты түрлі дөңгелек үстел, ашық сабақтар, сыныптан тыс іс-шараларын өткізіп жүр. Өйткені сол маман иесі атанған соң біз адал еңбек етуге тиістіміз. Шәкәрім атамыздың: «Адамдық борышың- халқына еңбек қыл, ақ жолдан айнымай, ар сақта, оны біл» - деген өлең жолдары біз секілді алтын ұя мектептерінен ұшқалы тұрған түлектерге бағытталған деп ойлаймын. Өйткені, халық алдына шығып ән салатын әнші болу. Адам өмірінің арашасы болатын ақ халатты дәрігер болу. Шәкірттерді білімге жетелейтін ұстаз болу – ол үлкен жауапкершілікті талап ететін мамандықтар. Адам жас кезінен бастап өзінің жүрегі қалаған мамандығына қарай бейімделе бастайды. Терең білім алуға талпынады. Өз бетінше ізденеді. Көп оқиды. Жоғары сыныптарда маман түрлеріне талдау жасайды. Өкінішке орай, қазіргі жастар қара жұмыс түрлеріне назар аудармайды. Ауылды аймақтарда ата-анасының ізін қуып, жұмысшы болып жұмыс істеп жүрген жастар аз. Олар туған жерлерінен жырақта, түрлі мамандық еңбек етіп жүр. Инженер, дәрігер, мұғалім, ғалым, журналист болу үшін көп оқып, ізденісте болу керек. Бақташы, сауыншы, егінші, шопан болу үшін ауылда жұмыс істеу керек. Елбасымыздың қолдауымен, әділ жоспарланған саясатының арқасында ауылды аймақтар көркейіп, жаңа жұмыс орындары ашылып жатыр. Барлық жағдайлар жасалған. Сондықтан, жас мамандар, болашақ маман иелері осыған назар аударсақ деймін. Жақсы маман болсаң өз ісінді ашып, жұмыссыз жүрген қаншама адамдарды жұмыспен қамти аласың? Керемет емес пе? Ал жақсы жұмысшы, кенші, құрылысшы болу үшін өндірісте жұмыс істеу керек. Астанамызды, еліміздің басқа да қалаларын алып қарасақ, күн сайын көркейіп, дамып, әсем зәулім ғимараттарымен көздің жауын алады. Неге бізде осыған өз үлесімізді қоспауға? Елбасымыз оқуға көп көңіл бөліп отыр. Ол біздің болашағымыз – жастардың қолында деп, бізге үлкен үміт артып отыр. Жағдай жасап отыр. Қазіргі таңда көршілес елде білім алып, елімізге даяр маман болып келіп жатқан түлектер қаншама! Біздің елде өндірістің барлық түрлері жақсы дамыған. Бірақ, жоғары сатылы мамандар аз. Қазақстан жері бай, құнарлы. Неге біз осы байлығымызды басқа елдердің билеуіне жол беруіміз керек? Неге өзіміз жоғары сапалы маман болмасқа? Елбасымыздың да арманы сол емес пе? Өз елімізде қандай мамандықтың түрі болмасын, қай саланы алып қарамасақ та «Қазақстандықтар» болуға ұмтылуымыз қажет.
