Тасдыкълайым
Мудире: А.И.Семедляева
Элифбе байрамы
I. «Мектепке биз кельдик» йыры янъгъырай .
Талебелер кирелер.
II. Оджанынъ чыкъышы.
Хош кельдинъиз сайгъылы ве урьметли ана-бабалар,къартана-къарбабалар оджалар ве мусафирлер.Бугунь бизим мектебимизде балабан байрам «Элифбе байрамы» 1-б сыныф талебелернинъ биринджи гъалебеси .Сайгъылы талебелер мен сизни бу байрамнен хайырлайым сизге сагълыкъ,селяметлик,бахт,къуванчлы айдын куньлер тилейим. Байрамынъыз хайырлы олсун!
Шиир: «Ана тили»
Р.Чайлакъ
Ана тилим,бу дюньяда сен ёкъ олсанъ,
Миллетим ёкъ,илим ёкъ
Ана тилим ,сен ёкъ олсанъ.
Меним ичюн яшав ёкъ!
Ана тилим сени джойсам,
Сай,озюмни джойдым мен!
Ана тилим,сен олгъанда,
Мен де барым,халкъым бар!!!
Ер юзюнде сен олгъанда,
Яшав,умют,къуванч бар!
Севем сени, гузель Къырым.
Табиатынъ пек дюльбер:
Къайда барсам, къайда бакъсам
Дженнет киби эр бир ер!
Мен анамны пек севем
Мен бабамны пек севем,
Ватанымны бильсенъиз ,
Джанымдан да пек севем!
«Ана», «Ватан» - экиси догъма эгиз
Мерхамети, сервети бирдай азиз.
Ана бизни догъура, ёл косьтере,
Ватан сонъсыз аяткъа къудрет бере.
Ана-Ватан - Къырымым, баба юртум!
Келеджегим, кечмишим анда меним.
Ватан меним къудретим, аркъам, сыртым,
Онъа багълы энъ азиз умютлерим.
Мен кичкене бу ешиль ташлы къыргъа
«Баба юртум» -дегенде ана тильде,
Юрегимнинъ везини башкъа ура,
Тувгъан анам къучагъын керип тура.
III. Йыр: «Элифбе байрамына»
Авесликнен окъудыкъ
Элифбе арифлерин.,
А-дан тутыл Я-гъадже
Огрендик биз эр бирин.
Багълама:
А, Б, В, Г, Гъ, Д, Е
Ерлештилер сыранен.
Ерлештилер сыранен
А, Б, В, Г, Гъ, Д, Е.
II
Элифбе байрамына
Азыряандыкъ эпимиз
Эр феске бирер ариф
Яздыкъ бизлер эпимиз
Багълама.
III
Арифлерни огреткен
Элифбеге тешеккюр.
Элифбени огреткен
Оджамызгъа тешеккюр.
Багълама.
IV
Сагълыкънен къал, Элифбе,
Биз сени унутмамыз.
Китап алгъанда эльге
Севип, сайып анъармыз.
Шиирлер.
Сеслерни догъру айтып
Арифлерни таныдыкъ.
Эджалардан сёз япып
Окъумагьа башладыкъ.
Эм окъудыкъ, эм яздыкъ,
Сёзлерден джумле яптыкъ.
Джумлеге джумле къошып
Шиир, масал окъудыкъ.
Энди ана тилинде
Эм окъуп, эм язамыз,
Китаплардан эр шейни
Окъумагьа азырмыз.
Ана тили Сейтумер Эмин
Мен бир сабий экенде,
Дёрт аякълап юрьгенде,
«Ана», деп мен сёз къаттым
Озь тилимни яраттым.
О куньден сонъ, эр кунь мен
Эки-учь сёз огрендим.
Окъуп-язам мен бугунь,
Ана тилим бу меним.
Бильмесенъ сен тилинъни,
Огренмезсинъ илимни.
Терек олып осерсинъ,
Бир шей бильмей олерсинъ.
Догъгъан еринъ Къырым сенинъ,
Эр тильнинъ бар догъгъан ери,
Догъгъан еринъ киби дюльбер,
Аджайипсинъ, ана тили.
Халкъым киби эпкин, уста,
Хызметтесинъ куню туню,
Чебер йигит къызларыдай
Гъайретлисинъ ана тили.
Бу дюньянынъ инджисидир,
Сенинъ азиз тувгъан илинъ,
Сен олмасанъ мен де ёкъым...
Бинъ яшайыкъ, ана тилим!
.
IV. Йыр «Мен анамнен лаф этем»
сёз. С. Усеиновнынъ муз. С. Какуранынъ
I
Ана тилини бильсенъ,
Эм де гузель лаф этсенъ,
Эр кес айтар: «Машалла,
Не де гузель бу бала!»
Багълама.
Мен анамнен лаф этем,
Мен бабамнен лаф этем,
Лаф эте-эте осем,
Йылдызларгъа мен етем!
II
Мен окъуйым ве язам,
Эзберден шиир айтам,
Достума мектюп язсам,
Ана тилинде язам.
Багълама.
Мен анамнен лаф этем,
Мен бабамнен лаф этем,
Лаф эте-эте осем,
Йылдызларгъа мен етем!
III
Кезинтиге мен чыкъсам,
Эр шейнинъ адынъ тапсам,
Осе меним юрегим,
Яшасын меним тилим!
Багълама.
Мен анамнен лаф этем,
Мен бабамнен лаф этем,
Лаф эте-эте осем,
Йылдызларгъа мен етем!
Шиирлер
Биз муктепте окъуймыз,
Илим,бильги аламыз
Тербиели намуслы
Талебелер оламыз.
Мектеп тувгъан эвимиз,
Айбетлеймиз,севемиз.
Догъмушлардай эпимиз
Яшамакъны истеймиз.
Эмекте ве окъувда-
Эр иште биз орнекмиз,
Чюнки аят ёлунда
Халкъымызгъа керекмиз.
Эр бир ишке мен фааль
Озь иссемни къошарым.
Алмакъ ичюн алтын медаль
Яхшы окъуп башларым.
Биз талебе яш балалар-
Къырымтатар несили
Биз олурмыз даим унер,
Интизамлы,унерли.
Мектеплимиз эй балалар,
Будыр бизим юртумыз
Ана тильни огренмеге
Эпимизнинъ борджымыз.
V. -Шимди исе бизим талебелеримиз сизге къырымтатар тилинде насыл лаф эткенлерини косьтереджеклер.
Буратино масалы
Парча
Чегертки кеманеде ойнай. Музыка илявеси.
Буратинонынъ чыкъышы: къолтыгъынынъ тюбюнде Элифбе, оннен чевре –четни долана ве китабыны джоя,отурып агълай.
Тильки ве пардошнынъ чыкъышы. Музыка янгъырай.
Тильки ве пардош: -Селям алейкум! Сен кимсинъ?
Буратино: -Мен Буратино!
-Я сиз кимсиз?
Тильки ве пардош: -Мен айнеджи тильки, мен кёр пардош.
-Я сен мында не япасынъ?
Буратино: -Мен китабымны джойдым,тапып оламайым.
Пардош: -Санъа китап не керек?
-Мен окъуп,окъуп кёр олдым.
Тильки: -Мен окъугъанымдан файда ёкъ.
-Билесинъми мында якъында батакъ бар,о батакъта къаплы бакъа яшай о 300 яшында,эр шейни биле, ондан сорасанъ айтыр.
Шемсиелернен оюн.
Буратино таш устюнде отура,къаплы бакъа яваш-яваш онынъ янына келе де:
Къаплы бакъа: -Сен не агълайсынъ,китабынъны джойдынъ ёкъса?
Буратино: -Я сен къайдан билесинъ?
Къаплы бакъа: -Мен эр шей билем,чюнки мен мында чокътан яшайым.
Буратино: -Китабым къайда олгъаныны да билесинъми?
Къаплы бакъа: -Эльбет билем,о мектепте 1-б сыныфындаки сандычыкъта.
Буратино: -Я мектеп о не?
Къаплы бакъа: -Мектепте балалар окъумагъа ,язмагъа ,саймагъа,тербиели олмагъа огренелер.
Буратино: -Мен да истейим!
Къаплы бакъа: -Мен санъа «Алтын анакътар»берерим,сен мектептеки 1-б сыныфыны тапып сандычыкътан алырсынъ ,Шимди оларда тамам йыр дерси.
Йыр «Мектебимизде бизлерни огретелер»
I
Арифлерни язмагъа,китаплар окъумагъа
Мектебимизде бизлерни огретелер
Къошмагъа,айырмагъа, ресимлерни сызмагъа
Мектебимизде бизлерни огретелер
II
Экиге эки къошмакъ,буюклерини саймакъ
Мектебимизде бизлерни огретелер
Тербиели акъыллы,интизамлы олмагъа
Мектебимизде бизлерни огретелер
III
Эзберлеп окъумагъа,диктантларны язмагъа
Мектебимизде бизлерни огретелер
Ватанымны севмеге,чокъ шейлерни бильмеге
Мектебимизде бизлерни огретелер
Балалар ерлерине отура.Мальвина,Пьеро ве Буратино къалалар.
Мальвина: -Я Сен кимсинъ?
Буратино: -Мен Буратино.
Мальвина: -Я сен мында не япасынъ?
Буратино; -Мен 1-б сыныфыны къыдырам,анда тылсымлы сандыкъ бар,саандыкънынъ ичинде меним китабым бар.
Мальвина: -1-б сыныф мында ,я сандыкъны ачмакъ ичюн анакътар керек да?!
Буратино: -О анакътар менде , мына!
Мальвина: -Кель берабер о сандыкъны ачайыкъ! Сандыкъны ачалар.
Буратино: -Мына,мына меним севимли китабчыгъым!Энди оны ич бир вакъыт джоймам!
Оюн «БУ-РА-ТИ-НО»
VI. Миллий оюн.
VII. Сёз мудиреге бериле.
VIII. Талебелер мукяфатлана.
IX . Билесинъизми бизим мектебимизде,атта бизим сыныфымызда бир ода бар,анда эписи китапларны сакълыкъта туталар:-Бу насыл ода?
-Китапхане!
-Догъру,китапхане.Я бизим китапханемизде ким чалыша?
-Эмирасанова Эсма Эбазеровна.
- Эсма Эбазеровна бизни эр вакъыт китаплар дюньясына теклиф эткени ичюн ,тешеккюрлер бильдиремиз.
Шиир
X. Ана-бабалар йыл девамында бизге къол туткъанлары ичюн,эр вакът янымызда олгъанлары ичюн, оларгъа тешеккюрлер бильдиремиз.
Аналаргъа багъышлангъан слайд.
Йыр «Севили анам»
XI. Билесизми йыл девамында бизге къартаналар,къартбабалар да ярдым эттилер оларгъа да тешеккюрлеримизни бильдиремиз.
Йыр «Меним къартанам»
