Аддезл адукацыі,спотру і турызма Пінскага райвыканкама
Дзяржаўная установа адукацыі “Табульская сярэдняя школа” Пінскага раёна
КЛАСНАЯ ГАДЗІНА
Вусны часопіс
“Як ты сэрцу майму міла, дарагая Беларусь!”
Падрыхтавала і правяла
настаўнік пачатковых класаў
Ціхоцкая Кацярына Міхайлаўна
Табулкі, 2016
Вусны часопіс
“Як ты сэрцу майму міла, дарагая Беларусь!”
Мэта: актуалізацыя ведаў вучняў пра Беларусь.
Задачы: пашырыць уяўленні вучняў аб роднай краіне, яе гісторыі, прыродзе,
славутых земляках;
развіваць пазнавальную актыўнасць;
выхоўваць любоў да Радзімы, гонар за родны край.
Абсталяванне: мультымедыйная прэзентацыя.
Ход мерапрыемства
Арганізацыйны момант. (Слайд 1.)
- Усе мы жывем на планеце Зямля. Гэта дом для ўсіх нас. Каб зберагчы гэты вялікі дом, неабходна палюбіць невялічкую яго частку, якую называюць Радзімай.
Наш родны край – гэта Беларусь, самая прыгожая, самая любая краіна. Ты жывеш тут, тут жывуць твае тата і мама, бабуля і дзядуля.
- Я – дзяўчынка-беларуска
З васільковымі вачыма.
Хоць малая, але знаю:
Беларусь – мая Радзіма.
- І зараз мы пагартаем старонкі вуснага часопіса, каб яшчэ раз пагаварыць пра нашу родную краіну, імя якой Беларусь, пра тое, што павінен ведаць кожны, нават самы маленькі, грамадзянін нашай Радзімы.
Першая старонка “Афіцыйная сімволіка Рэспублікі Беларусь”
(Слайд 2.)
- Паслухайце гісторыю. “Нарадзілася ў маці тры сыны. Кажа яна першаму:”Цябе, сынок, буду прасіць, каб насіў маю карону. Я спляла яе з жытняга калосся, канюшыны, ільну, якімі квітнее наша зямля”. А затым дае сыну чырвоную зорачку. “Беражыяе, - гаворыць маці, - і глядзі, каб ніколі-ніколі не патухла гэта зорка, бо з ёю ў сэрцы змагаўся наш народ за вольнае жыццё, за сонечнае неба”.
“Ты, сынок,- кажа маці другому, - насі адзенне, па якім усе будуць пазнаваць нашу багатую і мужную зямлю”. І апранула сына ў чырвона-зялёна-белую вопратку.
“А ты, сынку, птах мой галасісты, будзеш спяваць маю самую любімую, дарагую песню”,- папрасіла маці трэцяга сына і падарыла яму ноты і словы песні.
Задумалася маці: а якія ж імёны даць сваім сынам? А потым яшчэ раз звярнулася да сваіх дзяцей:”Ты, сынок першы, будзеш вядомы ў нашай Дзяржаве пад іменем Герб; ты, сынок другі, будзеш называцца Сцягам, а ты, сынок трэці,- Гімнам”. Так і жывуць у маці тры сыны: Герб, Сцяг, Гімн.”
- А хто іх маці, як яе называюць? (Рэспубліка Беларусь)
- Дзяржаўны герб, Дзяржаўны сцяг і Дзяржаўны гімн – гэта твар нашай дзяржавы, які адрознівае яе ад іншых краін свету. Кожны год- другая нядзеля мая- Дзень Дзяржаўнага герба і Дзяржаўнага сцяга Рэспублікі Беларусь. А калі гучыць гімн, абавязкова трэба слухаць яго стоячы.
Віктарына:
- Колькі колераў мае Дзяржаўны сцяг?
- Якімі кветкамі пераплецены Дзяржаўны герб?
- Што сімвалізуе чырвоная зорка на Дзяржаўным гербе?
- Што надрукавана на стужцы, якой абвіты Дзяржаўны герб?
Другая старонка “Белы бусел – сімвал Беларусі” (Слайд 3.)
-. Сімвалам нашай краіны з’яўляецца белы бусел. Народнае павер’е сцвярджае, што бусел прыносіць у дом удачу, дзяцей і шчасце.
-. Яшчэ з маленства
такую прымету
Я знаю пра бусла,
пра птушачку гэту:
Як буслік на хаце,
То і шчасце ў хаце.
-. У народным фальклоры буслы вядуць сваё паходжанне ад людзей і нават ад анёлаў. Буслы ахоўвалі жытло ад Перуна, былі ўзорам сумлення і вернасці. Таму і дапамагалі сяліцца побач з домам, майстравалі буслянкі.
- Ці даводзілася вам бачыць у нашай вёсцы бусла?
- А што вы можаце расказаць пра жытло бусла?
-. Няма радзімы без бацькоўскай хаты;
Бусліны клёкат – гэта родны дом;
Ты будзеш жыць шчасліва і багата,
Калі над хатай – буслава гняздо.
Трэцяя старонка “Прырода роднага краю” (Слайд 4.)
- Паглядзіце на карту Беларусі. Наша краіна нагадвае зялёны лісток на планеце Зямля. Яна багата лясамі, якія займаюць трэцюю частку тэрыторыі Беларусі. Наша краіна багата лугамі і балотамі, азёрамі, якіх больш за 10 тыс., рэкамі і рачулкамі, якіх больш 20 тыс.
Нарач – самае вялікае возера (плошча 80 км.кв.).
Доўгае – самае глыбокае возера ( каля 54 м глыбіня).
Свіцязь – адно з прыгожых азёр – дно пясчанае, вада празрыстая.
Віктарына:
- Якія самыя буйныя рэкі Беларусі? ( Дняпро, Нёман, Прыпяць, Сож, Заходняя Дзвіна)
- Якія птушкі жывуць каля вады ці на вадзе?( Качкі, гусі, чайкі і інш.)
- Якую рыбу можна злавіць у нашых вадаёмах? ( Плотка, акунь, лешч і інш.)
- Беларусам пашанцавала на прыгажосць і непаўторнасць краявідаў.
(Слайд 5.)
Чацвёртая старонка “Гісторыка – культурная спадчына Беларусі”
(Слайд 6.)
- Беларусь размешчана ў цэнтры Еўропы. Яна мяжуе з пяццю дзяржавамі: Расіяй, Украінай, Польшчай, Латвіяй і Літвой.
- Хто назаве сталіцу Рэспублікі Беларусь? (Мінск)
- На колькі абласцей падзелена наша краіна?
- У якой вобласці жывем мы?
- Які самы старажытны горад Беларусі? (Полацк – бацька беларускіх гарадоў)
З Полацкам звязаны славутыя імены, якія ззяюць нам праз стагоддзі. Даведайцеся, аб кім ідзе размова:
- Яна была першай жанчынай сярод усходніх славян, якую царква абвясціла святой. Па яе жаданні была пабудавана Спаса-Ефрасіннеўская царква і выраблены Крыж Ефрасінні Полацкай. (Е. Полацкая) (Слайд 7.)
- Знакаміты беларускі першадрукар? (Ф. Скарына) (Слайд 8.)
- Пра гэтага князя гаварылі, што ён можа абярнуцца то ваўком, то сокалам. У час яго княжання быў пабудаваны ў Полацку сабор у імя святой Сафіі? (У. Чарадзей) (Слайд 9.)
- Ён першым у горадзе Полацку пры адным з манастыроў стварыў школьны тэатр, а затым быў запрошаны ў Маскву і стаў настаўнікам царскіх дзяцей? (С. Полацкі) (Слайд 10.)
Пятая старонка “Ішла вайна народная...” (Слайд 11.)
- Галоўная падзея мінулага года – святкаванне 70- годдзя з Дня Перамогі.
22 чэрвеня 1941 года цішыню летняй раніцы парушылі узрывы снарадаў, лязгат гусеніц нямецкіх танкаў. Пачалася самая страшная для беларускага народа вайна.
Захопленая, але не скарыўшаяся Беларусь стала сімвалам усенароднай барадзьбы з ворагам, сімвалам мужнасці і гераізму.
- Асаблівай мужнасцю вызначыліся абаронцы Брэсцкай крэпасці, якая першай прыняла ўдар ворага. Больш за месяцвоіны без вады і ежы, амаль без боепрыпасаў, без медыкаментаў працягвалі змагацца з ворагам да апошняга абаронца. (Слайд 12.)
- Ва ўсім свеце вядома аб трагедыі вёскі Хатынь. Мемарыяльны комплекс Хатынь – гэта светлая і вечная памяць аб тых, хто заслужыў найбольшае права жыць, але каго ўжо няма з намі. За тры гады акупацыі было знішчана 209 беларускіх гарадоў, 9200 вёсак ( 628 з іх было спалена разам з людзьмі), загінула больш за 2 000 000 жыхароў беларусі. І гэтага мы ніколі не забудзем. (Слайд 13.)
-. Паміж вёскамі Новае Сяло, Пліна і Паперына на месцы былых баёў адкрыты м.к. “Прарыў” (1974г.). Ён увекавечвае подзвіг беларускіх партызан, якія ў красавіку-маі 1944г.прарвалі нямецка-фашысцкую блакаду і вывелі з акружэння 15 тыс. Мірных жыхароў. У цэнтры кампазіцыі – фігура воіна-партызана як сімвал нескаронасці народа. На мемарыяльным полі 33 пліты з іменамі герояў прарыву, 16 дубоў у гонар 16-ці партызанскіх брыгад. (Слайд 14.)
7. Рэфлексія. (Слайд 15.)
-. Няхай шчаслівай будзе зямля пад белымі буслінымі крыламі, наша з вамі зямля! І мы, грамадзяне Беларусі, павінны ганарыцца тым, што жывём у мірнай, прыгожай краіне, дзе жыве і працуе на карысць роднай зямлі мужны, працавіты, шчыры, добразычлівы беларускі народ. Мы павінны любіць сваю Радзіму і рабіць усё магчымае для яе росквіту і дабрабыту.
О Беларусь! Старонка дарагая,
Мне без цябе – як дрэву без вады.
Хоць непрыкметнай птушкай твайго гаю,-
А бы з табой... Навекі, назаўжды.
Спіс выкарыстанай літаратуры
Паноў, С. В. Мая Радзіма – Беларусь // Мінск, 2013. – с. 7-52
Кавалёва, Л. Д. Над Белай Руссю – белы бусел // Пачатковае навучанне: сям’я, дзіцячы сад, школа . – 2010. - № 10. – с. 62 – 63
